Embedded Files
Sòga til Jernvangen går attende til 1852, då Knut K. Rokne tok til med smedverkstad og jarn- og støypegodshandel på Vangen. Knut var oppvaksen på garden Rokne på Bordalen, og var son til «storesmeden» på Rokne. Eigedomen til Rokne låg då lenger vest på Vangen, om lag der som Park Panorama ligg i dag. Rokne vart etter kvart ein kjent vognmakar, og lagar den sokalla «Vossakjerra». Dette var ei stolkjerra med fjører, og vart etter kvart dominerande på heila Vestlandet. Sonen til Knut, Lars tok over verksemda, og stilte ut Vossakjerra på verdsutstillinga i Chicago i 1894. Lars flytte so til Amerika med huslyden sin. Mellom borna deira var den seinare so svært kjende Knute Rockne, trenarlegenda i amerikansk fotball. Georg (Jørgen) tok over verksemda i 1894, og han fekk etter kvart kommisjonslager Vestlandske Petroleumskompani og for Norsk Sprengstoffindustri.
Bygginga av Vossabana (opna 1883) og seinare Bergensbana (opna 1909) førte til stor vekst i handelen. Rokne leverte både borstål og all dynamitt til arbeidet med Gravhalstunellen mellom anna.
I aprildagane 1940 vart Vangen bomba av tyske fly, og nærast heile sentrum brann opp. Rokne sine hus gjekk med i bombinga og brannen. I åra etter krigen vart det arbeidd med attreising av Vangen. Nye gater vart teikna og nye hus vart reist. Rokne fekk no tuft lenger inne på Vangen, i krysset mellom Uttrågata og Skulegata, der bygget står i dag. Nybygget i frå 1952 vart teikna av arkitekten Hans Wichmann Rohde i frå Bergen. På framsida mot sør vart det montert eit flott smijarnsrelieff som er teikna av Jørgen Kildahl og smidd av Tor Skundberg. Det var no son til Georg, Birger Rokne som var leiar for verksemda då det nye bygget vart reist. Han sikra seg to tufter i uttrågata, men bygde berre hus på den eine.
I 1974 vart det gjort ei etterlengta utviding og modernisering av verksemda. Ein reiste då eit nytt bygg på tomta mot aust, i ei høgd. Samstundes vart Rokne med i Jernia-kjeda. Det var no Jørgen, son til Birger som leia verksemda. I 1992 vart nabotomta mot aust, «Helgelandstomta» kjøpt og i 1998 vart det bygd opp ei høgd på denne, som vart leigd ut til M. O. Mølster. I kjellarhøgda vart det laga parkeringskjellar med ti plassar. I år 2000 tok Even, son til Jørgen over verksemda og vart med det femte generasjon drivar av Jernvangen i familen.
Ei ny tid
I 2021 selde Rokne-familien selskapet AS Jernvangen til Voss Invest AS, som er eit 100 % eigd dotterselskap av Voss Sparebank. I 2023 starta eit større renoveringsprosjekt, der målet har vore å få eigedomen i størst mogleg grad attendeført til original utforming, samstundes som ein kan få den modernisert til dagens standard. Det er skifta tak, men der den originale vossaskiferen er lagt på att. Huset er isolert utvending med isokalk, og alle vindauge er skifta. I denne omgang er fire av seks bueiningar fullstendig pussa opp. Desse vert no lagt ut for utleige. Tiltakshavar har vore Voss Invest AS og arbeidet har vore utført av Voss Bygg og Landskap AS og Sigbjørn Vik og Son AS. Knut Myklebust og Bruket AS har vore ansvarleg prosjekterande og arkitekt på prosjektet.
Google Sites
Report abuse